ووردلس صنداااي

لما حياتك تكون متوقفة عرقم..

في احتمال نسافر وطبعا مثل كلم مرة لازم لبس للسفر خصوصا اذا صار حمل او ولادة
الصيف اللي طاف سافرت ونا حامل فاحتجت لبس للسفر لان القياس اتغير >>>> القياس رقم
حتى النعال او الجوتي يتغير >>>>> رقم
وهالسنة ما نزل وزني لكسل من طرفي >>>> رقم يحدد هويتي
الكل يعرفني بوزني الحين نسوا انا منو او شو كنت :(
المهم اني مب مثل اول لان وزني زاد >>>>>> بعد رقم
عندي ملابس مخزنة و حتى شوز ما اقدر البسهم عشان الوزن >>>> رقم
حياتي كلها متوقفة ع وزني >>>>رقم

يارب الامور تكون طيبة !! __ !!

روتيني فالسيارة !!

اكيد روتين :) وعادة بعد .. ان شاء الله تتغير
اول ما اركب السيارة .. احط اغراضي عالكرسي اللي عدالي
اشغل السيارة ... اشغل المكيف <<<<< ضروري جدا الحين المهم >>>> افصخ وانتوا بكرامة النعال او الجوتي
وياسلام لو كان الجوتي بسيور اللي يبي الباركن وراااي يدعي علي
لاني لين افصخ النعال يكون فاااار دمه
خاصة اذا علق السير :)

يار بي مستحيل اسوق بنعال ممكن اسوي حادث لازم يكون في كونكشن بين القدم والبريك :)
ولا ما اسوق
هل في حد يعاني مثلي !!

محتاجة اجازة

يالله صارلي اسبوع وانا ما قدر احط عيني بعين الدكتور
شغله على مكتبي صارله شهر
اسبوع اشتغلت فيه اسبوع مرضت وكنت اجازة وصارلي اسبوعين احس اني لازم اخذ بريك
ما اقدر اركز .. ما اقدر انتج .. ما اقدر افكر
لازم اخذ بريك بس ما عندي رصيد اجازات :(
يالله يوافقون و يعطوني بدون راتب تعبت من السواقة تعبت من الدوام تعبت من كرسي المكتب كرهت
ريحة الكوفي كرهت صوت باب الريسبشن طخ طاااخ
ابا اجااااااااااااااااااااااااااااااااااااااااااااااااااااازة

غير عاداتك ..

كل شخص عنده عادة معينة سواء كانت جيدة او سيئة وكلنا يتمنى ان تغلب العادات الطيبة
تغيير العادة ممكن لكنه صعب او محتاج ارادة وما في شي يتغير بين ليلة وضحاها
يعني الواحد محتاج يستمر في المحاولة مثلا قررت اني ما اعصب او اخفف من عصبيتي
ترا انا لو بنتي صاحت اعصب احس الموضوع صار حتى مش ارادي عصب وما اقدر اتحكم في تصرفاتي
صرت اذا شفت شي يضايقني ااخذ نفس عميق والف واطالع للجهة الاخرى يعني اشتت ذهني لفترة
بعدين اشوف اللي صاير
احس يعدها اقدر اتحمل شو بيصير
هذا مجرد مثال وهاعادة ما زالت تحت العلاج وان شاء الله اتغير

طبعا قبل كنت اقول اني بغير كل شي مرة وحدة وكنت اظن الموضوع عادي يعني
باجر بقوم الصبح بدري
راح امشي كل اليوم الصبح قبل الدوام 20 دقيقة
باكل العشا بدري
مش شرط العادات تكون جدا شيئة عشان نغيرها ترا حتى لما يمر يوم كامل وما العب مع بنتي اقول هي العادة لازم اغيرها
لان بنتي تتاثر ةتحس اني ما احبها
المهم ولا شي حصل لاني فكرت بهالامور مرة وحدة عشان جي قررت اخذها حبة حبة
وبتغييرنا للسيء ما ننسى عاداتنا الطيبة ونحاول نستمر عليها

وقد اثر عن علي بن أبي طالب رضي الله عنه انه قال (عوّد نفسك حسن النية وجميل القصد تدرك في مباغيك النجاح) وقال (عوّد نفسك فعل المكارم، وتحمّل أعباء المغارم تشرف نفسك وتعمر آخرتك ويكثر حامدوك) وقال (غالبوا أنفسكم على ترك العادات وجاهدوا أهواءكم تملكوها..).

روابط مفيدة

انا موظفة وعندي اطفال .. ولما ارجع البيت اتمنى اني اقضي وقتي معاهم العب معاهم ناكل نضحك
المهم اعوضهم عن الوقت اللي اقضيه في الشغل
ما بقول اني دايما اسوي هالشي لا انا مقصرة واغلب الاوقات اكون عصبية معاهم
غصبا عني وصار لي فترة احاول اغير من عاداتي وهذا موضوع ثاني يريد بوست بروحه
وان شاء الله اكون ام افضل واكثر هدوءا :)
طبعا من 6 لي 9 بالليل مش وقت كافي خاصة للي مثل حالتي دايما متوترة وما اقدر اوازن خاصة الايام اللي
ما ارتب اموري فيها يعني ما يكون عندي جدول ليومي كيف بيكون والاشياء اللي لازم اسويها والاولويات
ما علينا
لقيت اليوم رابط فيه أفكار نطبقها لما نكون مع بعض اقصد مع الاطفال مثل طبخة بسيطة
اشغال يدوية ... الخ
http://flipflopsandapplesauce.blogspot.com/

وفي رايط ثاني عجبني للطبخ (( عقدتي )) بجرب منه كم وصفة وبحطها في بوست منفصل
http://mamasfixins.blogspot.com/

وتوتة توتة

مش خلصت الحدوتة .. لا بدت :)
دايما اقرا بلوجات بالانجليزي عن امهات وربات بيوت وحياتهم وكيف ينظمون
حياتهم واستفدت منهم وايد
وكنت اتمنى يكونن بالعربي عشان اتواصل مع ناس لغتهم مثل لغتي
مهما شاركت بالانجليزي معاهم دايما احس اني مب منهم
واطباعهم تختلف عنا
عشان جي لغيت البلوج الانجليزي وبكتب بالعربي وان شاء الله حد يستفيد من اللي بكتبه